Наян дөрвөн шидтэний дуудлага
/ 84 Mahasiddhas /
/ 84 Mahasiddhas /
Наян дөрвөн мянган номын үүдийг нээнэ үү.
Наян дөрвөн мянган нисванисын хүчийг урвуулж,
Наян дөрвөн сэтгэшгүй бурхадын орныг цогцлооно уу.
Азар бузрын идээг рашаанд хувиргасан Лүейва.
Аньс билгээр ухаарвал аглаг, цэнгүүн ялгаагүй.
Аялаг тавлаг жаргалаа дияанд хувиргасан Лилава.
Найрын дугараа гүйцтэл нарыг аргамжсан Бирүва.
Бачит ертөнцийн төрийг номын төрөөр арилжаад
Бадмын дагинаа тэвэрч, барс хөлөглөсөн Домбива.
Атгаг үзлийн гөрөөсийг атиртал харвасан Шавари.
Санах сэрэхийн агаарт үзэгдлийн хөшгийг яраад
Самуун зүүдний хорвоог сарнитал дуулсан Сараха.
Арилсан утгын дагиныг ханиа болгосон Гангарива.
Аварга загасны хэвлийд номын дууг анирлаад
Арвис шидийн эрдмээр хотлыг бишрүүлсэн Минава.
Эрэмдэг зэрэмдэг биеэ эрдэнэд хувиргасан Зорангива.
Элбэрэл журмын сэтгэлээр буяны сүргийг хураагаад
Эгэл малчин заяагаа гүрүд хувиргасан Горагша.
Шалдар булдар үйлээс самадиг ургуулсан Винава.
Шашин номын далайгаас бясалгалын охийг нэрж,
Шавьдаа шавь ороод билгийг дэгжээсэн Шантива.
Очирын хот мандлыг гэрлээр нэхсэн Дандива.
Дивт нисванисын ширийг нигүүлсэхүйн усаар дэвтээж,
Дээдийн хүрдэн гутлыг дияанаар урласан Замарива.
Хурц билгийн илдээр хүлээсийг тасдсан Хангава.
Хуудуу сэтгэлийн төмрийг бодийн алтанд урвуулж,
Хутагт номын шидээр ертөнцийг гийгүүлсэн Нагаржуна.
Энэрэл нигүүлслийн үүднээс сургамж болгосон Ганхава.
Эцэс чанадыг туулавч сүсэг ахарлаж болохгүйг
Эгнэгт бишрэнгүйн үүднээс үлгэр болгосон Гарнарива.
Чивэлт ертөнцийн худлыг худлаар ерөндөглөсөн Таганава.
Цэцэгт хурсан балыг урнаар хүртэх зөгий шиг
Цэцэн багшийн увдисыг итгэлээр хүртсэн Нарова.
Айдас хүйдсийн уяасыг аянд нь тайлсан Шалива.
Аясын салхинд бүжих хурмастын цагаан үүл шиг
Ашиг, алдрын хорвоог ганд нь орхисон Дилова.
Эрдэнэ судрыг үүрэн Замбуулинг адисласан Задраа.
Бие, сэтгэлийн алинд ч баригдах үзлээс гэтлээд
Бярман омгоо таягдан билгүүнийг хүртсэн Бадраа.
Хослон орохын шидээр хорвоог урвуулсан Духанди.
Хотол мянган ертөнцийг нэгэн дусалд багтааж,
Хойрго залхуу зангаа ариунд хувиргасан Азоги.
Гагц чанараар цэнгэсэн галзуу егзөр Галава.
Гайхамшигт багшийн увдис Гангын урсгал шиг буухад
Гаслан буртгаас салсан гавшгай угаагч Дубива.
Ариун сэтгэлийн байгалийг илтэд нээсэн Гангана.
Асралт эхийн сургаалаар аглагийн орныг зориод
Айсах шулмын аймгийг номд оруулсан Гамбала.
Хүчир үйлээр гэгээрэх эрдмийг үзүүлсэн Дэнгива.
Хүслэнт тэнгэрт хоргодолгүй хүний ертөнцөд буугаад
Хүлээс бүхнийг тайлах самбааг олсон Бандэва.
Арилсан чанарт уусаад амгаланг хүртсэн Дандэва.
Өнчин дорой бүхнийг үрээн гэж санах шиг
Өлдсөн жингэрийг асраад дагинатай учирсан Гүгүрива.
Сэлүүн хоосны агаарт шингээж амарсан Гүзива.
Шимтэн судалсан номоо шижир илтэс болгоод
Сэрүүн ухамсрын төвд хайлуулж нэгтгэсэн Дармава.
Адтай сэтгэлээ мөшгөсөөр арилан гийсэн Махива.
Ашиг олзны эгээрлийг зүрхэн огторгуйд тодруулж,
Алтан одыг ажигласаар амарлин төгссөн Азинда.
Үүлэн борооны цэнгэлээс шимийг дээжилсэн Бабаха.
Үнэр ялдам лянхуа балчиг дундаас ургах шиг
Үелзүүр таашаалд дулдуйдан чанадад хальсан Налина.
Анчин гөрөөчин гэгдэвч утгыг тайлсан Бүсүгү.
Гадас царил баривч би-гийн үзлийг тасдаад
Газар шороо малтавч сэтгэлийг ярсан Годали.
Уудам огторгуйн үүдийг нээж харуулсан Индрабуди.
Хуудам сэтгэлийн ховсонд зүүдэлж яваа хүмүүст
Хурдан сэрэхийн дохиог сануулж ширтсэн Мэгова.
Адал нисванисын төмрөөр очирыг урласан Гамбари.
Ахуй их ертөнцийг авадүдийн судсанд хурааж,
Ариун эсэрийн нүхээр атгагийг хөөсөн Заландра.
Тэнгэрийн рашаан хураар заль дэгжээсэн Рахула.
Тээрт бодол бүхнийг огторгуйн цөгцөнд юүлээд
Тэгш үзэхүйн увдисаар зул асаасан Дармава.
Үлэмж амгалангийн эдээр дүүргэж чадсан Догарива.
Өнгөт орчлонгоос хайлтгүй үнэн номын үрийг
Өөрийн бие дэх тариаланд ургуулж чадсан Мэдина.
Аръяабалын гэгээнд тахил өргөсөн Бангаза.
Амраг хүслийн хонхноос очирын эгшиглэнг дуурьсгаж,
Атгаг үзлийн толгойд аянга буулгасан Гандава.
Хорин дөрвөн орноор тойрон ариуссан Зогива.
Хотол ертөнцийг хураасан гол судлын нууранд
Хонгор галуун сүнсээр хөвөн цэнгэсэн Залуги.
Аглаг хоосны агаарт уусган бясалгасан Годурива.
Амраг садны үхлийг гэгээрлийн дуудлага болгоод
Ахуй, нирваан хоёрыг нэгтгэн оносон Лүзига.
Альхан учрал бүрийд уяран хайлсан Нигүна.
Ариун номын сахиусаа балин тахилаар баясгаад
Аясын тохиол тутамдаа адис хүртсэн Заяананда.
Эргэлзээ нь үгүй сүжгээр ариусан гийсэн Базари.
Энгүүн сэтгэлийн байгалиас цэцгийн хүрээлэнг нээгээд
Элбэг эрдмийн балаар хөлчүүрэн цэнгэсэн Замбага.
Хохь гуйранч заяанаас богд болсон Бигшана.
Алдхан биеийн гүнжидээс атгагийн тосыг шавхаад
Арилсан ухааны голд зул өргөсөн Дэлива.
Билгийн галаар шатааж, гэгээнд урвуулсан Гүмбари.
Ертөнцийн үймээнд алсарсан зуурам хүний амьдралыг
Тарнийн усаар сүрчиж, дияанд хувиргасан Зарбари.
Зүйр утгын дохиогоор огторгуйд хальсан Манибадра.
Зүрхэн хүрдний мэсээр би-гийн толгойг тасдаад
Зүггүй гэгдэх хочоор дагина болсон Мэхала, Ганахала.
Хажид цэцгийн хураар хорвоог ариулсан Гилагила.
Хамаг үзэгдэл ертөнцийг хамба хилэнд хувиргаж,
Хажих – ажихуйн оёдлоор чойго урласан Гандали.
Өвчин шаналал бүгдийг илбэнд оносон Дахулива.
Өлзийт сэндэр түүхдээ хүрдэн мандалд нэвтэрч,
Үнэмлэхүй гэрлийн агаарт элин хальсан Удилива.
Мөнх билгийн рашаанаар дүүргэн цэнгэсэн Гавалива.
Энх бусын ертөнцийг баатар дияанд эрхшээж,
Энгүй зүрхний долгисоор товрог болгосон Гирбала.
Ариун бадмын хүйснээс хувилан мэндэлсэн Сагара.
Амин галын илчээр уудам хэвлийн хөндийд
Ахуй бүх орчлонг уусган хайлуулсан Сарвабагша.
Хамгаас дээд номд хуврагийг тэргүүлсэн Нагабоди.
Хаан язгуурт мөртлөө дуучийн боол болоод
Хамгаас доод сууринд тэнгэрийг ахалсан Даригаа.
Хасалж шүтсэн ядам нь бурхадын бурхан Будалива.
Хавт сайхан гутал нь самадийн хөлөг болоод
Хангир жингэр чимэг нь хоосны дурдлага Убанаха.
Үйл үрийг ухаарч үүрд гэтэлсэн Гогила.
Өнгө зүсний сайхан нь нэгэн хормын солонго шиг л
Мөнх бусыг сэхээрч мөр шулуудсан Ананга.
Хатан ямбыг огоорч галзуу дүрийг барьсан,
Хотол олны дундаас хог цэвэрлэгчийг адисласан,
Хорин хэдхэн насандаа хорвоог туулсан Лакшимкара.
Эрхэм гэгээрлээр дутвал шимгүйг ойлгосон Вияали.
Эсэр оройн үүднээс гэрлийн хурыг буулгаж,
Энхжин жаргалаар бялхвал үхэлгүйг таньсан Самудра.
Рашаан адис ундраг, амьсгал бүрт минь хурай!
Цадиг дууллыг тань аялсан үнэн зүрхний сүсгээр
Цагаан лянхуа дэлгэрэг, алхам бүрт минь хурай!
Comments
Post a Comment